अनुत्तरित प्रश्नहरु

तस्वीर स्रोतः
http://www.lalitkalacreations.blogspot.com/
राज राइ

कुनै कथाको एक पात्र झैं 

अनुत्तरित प्रश्नहरुका ठेली बोकेर

म ठिङ्ग उभिएको छु

धर्म र अधर्महरु केलाउन्दै

जाती  र जनजाती सोच्दै

गणतन्त्र र प्रजातन्त्र सोच्दै

म आफ्नै आँगनमा 

हरेक बिहानी, पर्देशिदै छु

बिदेशिदै छु ।

धर्म के हो ?

अधर्म के हो ?

जाती र जनजातीहरु ?

मानवता ?

म बुझ्दिन

किनकी 

म

आफ्नै आँगनमा 

हरेक बिहानी, परदेशिएको छु

विदेशिएको छु ।

मधेशी र पहाडीको बिचमा 

कैयौं पटक मरेको मान्छे म

लिम्बुवान र खुम्बुवानको पेलाइमा 

धेरै पटक चिरिएको मान्छे म

म मेरो जाती खोज्दै छु

म मेरो धर्म खोज्दै छु

एउटा भोको ज्यामी

म मात्र एक छाक ढिँढो 

र 

एक मुट्ठी पानि खोज्दै छु

किनकी

म

आफ्नै आँगनमा 

हरेक बिहानी, परदेशिएको छु

विदेशिएको छु ।

स्वतन्त्रता र गणतन्त्रका नाममा

शाहु, चन्दाले दिक्क छ,

सडक नेताले ठिक्क छ

साहु र सडक बिचको मेरो डोको र नाम्लो

खै कसको अधिकार भित्र परेको छ ?

नांगा र भोका लालाबाला 

चाल्नो परेको बुढीको फरिया

यद्धपी,

म ज्यामी , मजदूर,

म मेरो जाती खोज्दै छु

म मेरो धर्म खोज्दै छु

किनकी

म

आफ्नै आँगनमा 

हरेक बिहानी, 

परदेशिएको मान्छे ।

विदेशिएको मान्छे ।

- विष्णु प्याकुरेल